مجرد بسمة بهتانة
على الشفة إللي شقيانة
بتعمل فرق
وبتنور ف عز الضلمة زي البرق
وبتصحي ف قلب الخلق أحلامهم
تبان السكة قدامهم
سواء للغرب ولا الشرق
ويمشوها يلاقوها تدور بيهم
وبتجيبهم توديهم وتفرحهم تِبَكيهم
وإيه يفرق
ما دام الهم بيجمع قلوب الناس
ولسه الصدر بيعافر مع الأنفاس
ولو بالتيلة والعافية عدلنا الضهر م الكافية
وخطينا بقدم حافية وسبنا القلب للإحساس
ساعتها حتى لو غابت شموس الكون
في عز الضلمة هانحسس وهانشبك أيادينـا
ومهما ها يجرى مش ممكن هانبقى تاني وحدينا
وفين ما السكة ترمينا تلاقينا
مجرد حلم جمعنا وشبعنا ودَفّانا
ولو توهنا ترجعنا مجرد بسمة بهتانة