بحبك وخايف سياسي هاني فاروق الجمل

بحبك …..وخايف منك ..
وخايف عليكي من اللي منك ..
خايف على أمي .. على دمي
والخوف ملاني عليكي ..وملاني من ناحيتك ..
وارجع وأقول م أنا برده إبنك !!!
م الأم ممكن تكون قاسية على اولادها .. عشان بتحبهم
وساعات كتير بتقول لهم كلام كتير ..من ورا قلبها
وتزهق عليهم .. تزعلهم … وتنهرهم .. وتضربهم
وف أخر الليل تجري تنام في حضنهم .. وتضمهم
ما اهو انتي أمي .. بحبك [/b]
بس الشعور اللي بيشتتني ويخوفني منك ..
انك تكوني بتعملي فيه كده ومضغوط عليك ..أوغصب عنك
إوعي يا أمي يكون في حد غاصبك ؟؟؟
أنا ممكن اتحمل يا أمي أي قسوة عليه منك
وأعادي الكل رغم القسوة والحرمان ..
واشيل حياتي على كفي عشانك .. وأنا مش جبان
لكن بشرط… يكون قرارك اللي نابع بس .. منك
إوعي أحس ف يوم إنك بترضيهم على حسابي
ولا أشوف في عنيكي خوف منهم وتضيعي شبابي
ساعتها مهما تقولي لي .. عشان أحميك.. عشان أعليك ..
عشان وعشان .. هتبقي بتكدبي عليه .. وهتخسريني
يا أمي .. أنا بحبك .. خليكي جنبي ..
اقري معاي كل حرف وكل كلمة في كتابي
خلي بالك مني .. وقربيني من أخواتي ..وأحبابي
خليني أقول رأيي بصراحة .. ومتقفليش بابي
ولو غلطت سامحيني .. وإديني فرصة .. وعلميني من تاني
مش انتي أمي … وطول عمرك شايلة همي وانا صغير
ولما كبرت .. مش مستحملاني ليه .. هي الأم بتتغير ؟؟؟
ما أنا ظلموني ناس فيكي وعلى ترابك … وسبتيهم
على الأقل دلوقتي تساعديني .. لحد ما اتغير!!!
وانفض صدا الظلم والحرمان من على جسمي ..
من على فكري .. وأعيد حساباتي من تاني ..
استحمليني يا أمي ..
م أنا إبنك .. ومدي إيديك وشيليني من اللي أنا فيه ..
ده أنا في هموم وديون قد التل … وشبابي خلاص إتعل ..
وروحي بقت جامدة ومشاعري اتبلدت ع الكل
اعذريني .. ما أنا دقت الهوااان والذل
اصبري شوية عليه .. ما انا إبنك … وبيحبك
ده انا عشانك أشيل جبل فوق ظهري ولو مكسور
وجسمي يكون ليكي جسر تدوسي عليه .. يوصلك للنور
وقلبي ووجداني معاكي …
ومش عاوز أخاف منك ,, ولا عليكي
يا أمي … خلي بالك …ده أنا بس واحد من ولادك ..
وبقية ولادك كلهم زيي … حبوكي ,, حنينة .. قاسية ..
وهما عارفينك ..حافظين ملامحك ..
وشربوا منك .. داقوا قمحك
عاشوا الضنا فيكي وعلى أرضك ….
واتهانوا ..و انضاموا كتير .. وقدروا عذرك
ولما ثاروا .. شالوا علمك … واترموا تاني في حضنك ..
عشان ولادك …
طبعا فهمتيني يا أمي ..
وعرفتي بحبك قد أيه .. وخايف منك أو عليكي ليه ..
بحبك وخايف …