غناوى الروح
شعر : محمد عبد القوى حسن
...
طالعه البشاير من عيونك
صبح بيحاكى صفاء الشوق
وانت بتهلى على جسر العبير
نازله على كمك
عصافير من ابريل الغيطان
بتوشوشك بالسر
تتبسمى
فيميل جريد النخل
ويهادى حنان قلبك
بهزه من ربيع
يطلع دعاكى على فرع اللمون
وطن من مايو يحضنى
فيكسينى
بخضرة كون فى
شرايينى
حليب الطيبه والعناب
يا سهرانه
على اخر شعاع للنور
تحنى ملايكة الجنات
القانى بين ترعة مصيرك
طفل بيلملم قدوم الطيف
من على وش العصارى
اللى تلامس زرعك الطالع
حكاوى واغنيات من مهج
بتسيل
فتروى النيل بدمعاتك
وتكسى الشط
على طميك تملى تحط
وبتلامس ندى المشاوير
سكن من طيبه بيغازل
حنان الكون
وانا المفتون بتحنانك
اراضى الكل علشانك
واجمع من على
قسمه ونصيب الطيبين فيكى
نشيد الروح
امل مسموح لكل الخلق
عجين مفرود
لافران البشر والطير
سلام من قلب بينبت ف محرابك
ونسماتك دعا مقبول وكف يهادى ويراضى
وصوت بينادى حكاياتك
بعلو الحس متوضى
ببقايا الروح
ندى قلبك فى اوردتى
بيحيينى
ولا اقدر امد اليد
ولا اعدى
فى محراب السنين الشوق
اهادى بقلبى ايامك
ولا املك تراتيلك
فى صبح وعصر
فى احضانك
ابات باكى
_________________
الرئيسية 
أحدث الصور 
التسجيل 
دخول 
الإثنين أبريل 01, 2013 10:13 pm