نعيب عليك ولاّنعيب على الزّمان عبد الستار زروقي

نعيب عليك ولاّنعيب على الزّمان......ونعيب على قلبي إلّي عليك هان

ولاّ نعيب على وردك يا رمّــــــــان......إنّك بقيت معلّق فوق أغصـــــــان

*****

يمكن نعيب عليك يا روحــــي ......ونعيب كيف صرّحتلك ببوحي

يومها عمّقتِ فيّ َجروحـــــي........سكّنتني في برّ غير أمــــان

*****
أصل الهوى ليك خذانــــــي ......لاشاور ولا طلب إستئذانـــــــي

غافلني في حضنك رمانـــي.......لقيت حالي في قبضة السّجّان

*****

عشت رهينة مدّة و سنيـــن .....نومي تنهيدة ويقظتي أنيـــن

عمرو ما عرف يحن ولا يليــن .....جرّعني كاس العذاب ألــــوان

*****

نساني تركني داخل سجني.....لاسأل ولا في عَفْوِهْ دَارِجْنِي

زاد كثّـّر القُفُلْ ماخرّجنــــي.... حتّى الحيوط تغلـّفت بِبْطــــــان

*****

احترت لشكون نشكي بدايا..........وحيد غير صوت الصّدى معايا

حتّى نورك يا القمرة الضّوّاية..........هجرني غاب ورا الأحـــــــزان

*****

وانت فينك ياشمسنا الحنينـة.........فين دفاك ماعاد يطل علينـا

خذاك الهجربضوّك نسيتينــــــا........نورك حزن على قلبي مابان

*****

لا/موش أنا إلّي تحقرني.......ولا أنا إلّي بحبّي تقهرني

نحلف بالله إلّي صوّرنـــي.......نردمك معاه تحت أطنــــان