قصيدة بحلفك سرقت كم هاني ابو الفتوح

بَأحَلِفكْ سَرَقتْ كَامْ
يا كبير بلدنا ! .. يا اللي كنا فاكرينه كبير
إن كنت لسه بصحتك وعقلك تمام
نحلفك بالله تقول سرقت كام ؟
أنا مستعد إني أسامحك والشعب كله راح يسامحك
لو ارتحنا وعرفنا الحقيقة بس إنت ابدأ في الكلام
.................................................. ............
أنا كنت فاكرك قيمة عالية ورمز وطني له احترام
معقولة تخدع كل شعبك . كل عيشتك م الحرام
معقولة ربك مش في بالك كل همك ترضي ابنك والمدام
دلوقتي أنا تعبان قوي وبحلفك بالله تقول سرقت كام ؟
.................................................. ...........
إن كنت مش عاوز تقولها عالملأ قول لي لوحدي
صدقني قول سِرَكْ في بير
أنا كنت فاكر إنك أبويا وساعات أقول أخويا الكبير
ريحني مش قادر أنام
كل الكلام اللي قريته وأسمعه عنك خطير
ليه كده خَدَرتِنا و نَيمْتِنا 30 سنة نِشَخَرْ شِخِيرْ
دلوقتي من يوم ما مشيت خاصمت نومي والسرير
أنا كنت أنام مبسوط أوي لو نمت عالأرض
بس إنت تتغطي بحرير
وكنت أصوم من غير سُحور من غير فطار
أهم حاجة إنت اللي تِفطر بالهنا والشفا
بالعسل والمِشَلتت والفطير
.......................................
كانت سعادتي إنك سعيد
ولو كنت أشوفك بتقول كلام
أي كلام ... تِبْقَي كل الدنيا عيد
كنت أدعي ربي عُمرك يِطُول
ويخلي أجرك عننا أجر الشهيد
ولا كنت أفكر في الغلاء
وألا أركب إيه . ولا الولاد . ولا العَلام
ولا كنت مشغول بالسكن وألا أسعار الحديد
ولو كنت أسمع حد بس بيشتمك
أدعِي عليه . أفضل أقول منه لله البعيد
.................................................. .........
بقت حياتي في اللي مكتوب في الجرايد
والفضايح والفساد
و اللي إتنهب من أرض بلدي وحقها ودم العباد
واللي طفِشْتُه بعمايلك من ولادها
حلف ما يرجع للبلد . غاب عنها وعِشِق البُعاد
واللي إنت كارهه بتسجنه يقضي عُمره جوه سجن
سهل الدخول .. أما الخروج فملوش ميعاد
واللي إنت راضي عنه يسرق في البلد
ويقسموها عالمعارف والنسايب والولاد
.................................................. ............
واللي بِِِعْتُوه من أراضي بتبيعوه بِرُخْص التراب
للحبايب والقرايب والكلاب
وألا فضايحك في السجون
وإنت بتعَذِبْ شيوخ . وألا تِقتِل في الشباب
لو دا صحيح .. مستحيل إنك بشر .... مستحيل
عُمرك ما فكرت في موتك والحساب
ما قريتش آية واحدة بس تغيرك
و تْخََوِفَك م النار و العذاب
بقي كل همك إن ابنك يورثك ؟ ويبقي سُلطَان زي أبوه
و إنت بتموت سَايبْ البلد كله خراب
أنا كنت فاكر اللي زيك كل فكره في سِنُه ده
إنه يكفر عن ذنوبه , كل همه قبل مُوتُه , يقولوا تاب
وكلت أمري فيك لربي . جننتني . حيرتني طيرت عقلي
عشان كده كتبتلك , وقلت أَبعَتْ لك جواب
.................................................. ..................
بالله حَلِفْتَكْ . بالغالي حَلِفْتَك , قول لي حرامي ولا لأ ؟؟
في الآخرة كله هَيتكَشَفْ , ربك قوى وعَدْلُه حق
دلوقتي جه وقت الحقيقة والكلام المُسْتَحَق
السكوت ما ينفعك . الكلام وقته اللي دَقْ
.................................................. .........
كل البلد بتسألك : سرقت كام وسرقت ليه ؟
واللي حصل لك دا اسمه إيه ؟
ثورة شباب ؟ ولا غضب من ربنا ؟ !!
إنت افتكرت إنك إله ولا بشر .. !!! مش زينا
إن كنت فاكر إنك بريء
ساكت لفين ؟ اطلع وقول خليك جريء
.................................................. ....
راح تِتسئَل في الآخرة والدنيا كمان
دا هيعملوا لك المحاكمة في الميدان
نفس المكان اللي إتقتل فيه الشباب
هيشنقوك لو كنت خاين أو حرامي
مفيش سجون ومفيش لومان !!!
.................................................. ....
يا خسارة !! كانت حياتي كلها هي سعادتك
بس خلاص !! دلوقتي بعد اللي حصل
آن الأوان أسأل سيادتك
إنت حرامي وألا لأ ؟؟؟
جاوبني متضيعش وقتي ولاَ وقتك
قرب لي أشوفك . خليني أحط عيني ف عِينيك
دا لو صحيح تطلع حرامي
مُوتك حلال ... السجن دا قُلَيلْ عليك
.................................................. .............
بُكره النيابة هَتمْسِكَك ويبهدلوك
قول الحقيقة قولها لإبنك و لا أخوك
حرام عليك شوف كام سنة إتحملتها وصابر عليك
تدفني في البحر بالعبارة .... راضى
تدفني بالقطر أسامحك ! بردو راضي
يتهد بيتي عَلَيا . أموت تحت الصخرة
ما ألحق حتى أنادي
تِزَوَرْ انتخابات أقول حَقُه عليا . خليها تِعَدي السنة دي
أنا كنت راضي بقسمتي وبدنيتي
كنت ساكت لما قُصادي تِقَسِمُوا كل الأراضي
أنا كنت راضي بشغلتي و بكام جنيه
عمري سألتك مرة واحده و قلت لك مليار دا إيه ؟
.................................................. ............
فاكر زمان
أما كنت أشوف صورتك في الجريدة
أجري اشتريها وأفضل أبوس . أفضل أبوس
دلوقتي لو أشوف صورتك عالحيطة
أمشي عالحيطة بالجزمة و أدوس
و لو حرامي جه سرقني في الميدان
أصرخ وأقول امسك حرامي
كل الشباب يجروا وراك ويضربوك
بالمنفضة زي ما يهشوا الناموس
وكلت أمري فيك لربي
لا أنت أبويا ولا أنت أخويا ولا أعرفك
يا رب ما تقبل منه تُوبَِه في الدنيا وفي الآخرة يِلُوصْ
.................................................. .................
فاكر سؤالي عشان بأدَوَرْ عالفلوس
يا غشيم ... إنسي السؤال
والله ما هَمِتْنِي الفلوس , والله ما هَمِتْنِي الفلوس
كان كل نَفْسِيْ تكون شريف
وأعيشها حاف من غير غموس ,,,,,
أعيشها حاف من غير غموس !!!!!