قصيدة بعنوان ( بُق عصير حُرية ) أشرف محمد شلقامي

شكلك بتشَبِّه شفتني فين !
وبتسأل روحك عنِّي دا يطلع مين ؟ !
وعنيك ...بتفتش ف دفاتر
فوق رف دماغك مركونة !
وبتعصر نُص دماغك زي لمونة
والنُص التاني جحر صوَّان ف طاحونة
بتمُط شفايفك م الدهشة وبتبلع ريقك
وبتخبط كل حواسك ف أجمد حيط
وتقول : مش ممكن مش معقوله ؟!!!
دي حقيقة ولاّ دا حلم يا عين ؟!
***
اللي أنت عرفته زمان كان حد
من إيدك كان والأرض
وف حاله لوحده ما يعرف حد
ولا ليه ف هزار ولا يعرف جد
ولا حتي ف أيها حسبة تشوفه رقم يتعد
***
اللي أنت عرفته زمان
كان حد يادوب برسيم بيحِّش
بيطيع التور وبأمره بيمش
وبأمره بيطلع برَّه بنفس الأمر لجوَّه يخُش !
وإن لمحت عنيه خياله يخاف
ولا يعرف غير العيش الحاف
والبرد ف عتمة ليله لحاف
وليلاتي الريح بتهِّد العش !
***
عندك حق متعرفنيش وأكيد معذور
إللي إنت عرفته زمان ...
كان أصدق وصف عليه يتقال طرطور
أو تور متغمِّي ف أيها ساقية يدور
ويصوم ويصلي ويشهد زور !!!
وملوش غير دور عبد المأمور
ويشيل ف نهاره الهم ..
ف نفس الهم ينام محشور
وحياته طابور
وبعيد عن شنبه يصيبه الدور !
***
إللي أنت عرفته زمان
كان بس يادوب يسمع ويطيع
وخروف ف قطيع
وف عز الريح والحر يقول الجو بديع !
ويقول علي أحمر تور .. دا ما شا الله عليه ف العلم ضليع !
***
إللي أنت عرفته زمان
كان واحد عايش ميت
يضحك م الحزن ف عز الفرح يعيَّط !
ولا يعرف ليه بيقول ولا يسأل إمتي هايسكت !
إسم يادوب مكتوب وف أخر الدفتر
ولا فارقه يغيب ولا تفرق يحضر!
ولا بيقدِّم ولا بيأخر
ولا يقدر يوم يتأخر !
وعليه ممنوع الفَهم
ويموت لو فَكَّر إنه يفَكَّر
***
كان حد ملهش ملامح
يسمع ويطيع ويسامح
ولا فارقه معاه بكره من إمبارح
يحزن سُكيتِّي ف سِرِّه ويشكي
ممنوعة دموعه عليه ولا يقدر يبكي
***
إللي أنت عرفته زمان
حد حياته البيت والغيط
مزروعة عليه السكة عيون وطاويط
وأودان مزروعه عليه ف الحيط !
وكأنه حمار بيشيل أحمال ف شوال وغبيط
وف أحلي حالات الفَهم حداه
هاتقول ده حد حقيقي عبيط !
***
دا إللي أنت عرفته زمان !
أنا غير إللي أنت عرفته زمان
من حقك تسأل تاني كمان
وتقول أنا مين وعليَّ تشَّبِه
وتقول معقول غفلان إتنَّبه ؟!
معقوله خطاوي التايه عرفت سكة ؟!
ودموع الملح ف عينه اتقلبت سُكّر ضحكة ؟!
***
معقوله أصدَّق عيني يا ناس ؟!
ومنيش وهمان ومهش وسواس ؟!
معقوله ياناس ؟!
الطير ف سماه ..مبسوط بيطير من غير حُراس؟!
وبقاله زمان ومكان وكيان وبقاله إحساس ؟!
ومهوش محبوس ف قيود وحدود وسدود واقفاص ؟!
ولا ألف كمين ..يسأل علي فين أو جاي منين
ويعد عليه الأنفاس ؟!
***
معقوله الشمس بتطلع تاني
ف نفس مكانها ف نفس الشرق ؟!
معقوله بيقدر تاني يقول وبيرفع صوته الحق ؟!
معقوله قطر الصح بيمشي لوحده طبيعي مش بالزَّق ؟!
واللوحة مرسومة طبيعي بريشة ولون مش قص ولزق ؟!
ومفيش تعبان .. هاتبان له نيبان ..ويُطل يبان .. من أيها شق ؟!
***
معقوله رجعت تاني الميَّه بتروي؟!
والبدر مبدد كُحل العتمة وفارش نوره بيضوي ؟!
***
بقي عادي الهوا مبقاش ممنوع؟!
من حق القلب يدق براحته جوَّه ضلوع ؟!
***
معقوله القسمة بعدل بقت موزونة ؟!
واللقمة حلوة حلال وبقت مضمونة ؟!
***
متستغربش يا صاحبي وتقول ياااااه
من قلبك قول سبحان الله
ليه المُلك .. وليه العزَّة .. وليه القوة .. وليه القدرة .. وليه الجاه
وبيقبل دعوة عبد وقف علي بابه واترجاه
وبيفرح بيه ويداري عليه
مهمن كان العبد عبيط وعصاه
***
متستغربش
أنا هوَّبعيني يا صاحبي
الطفل التايه كان وبيحبي
رفعت إيديا وقلت بقلبي ياربي
زيح الغُمة وفرَّج كربي
دا الكرب يارب كبير
وأنت يارب عظيم وكبير
ربي راد لي يا صاحبي الخير
جمعني عليا وطمِّن خوفي
وخد بإيديا وضم صفوفي
وحرر روحي ف التحرير
ربي يا صاحبي عظيم وكبير
***
تعالي ياصاحبي ليمي ف ريحي
أحضر فرحي وشوف تفاريحي
م الحرية إشرب وشاركني
واتفضل خد لك بُق عصير
م الحرية إشرب وشاركني
واتفضل خد لك بُق عصير