انت ..شعر حلمنتيشى..

انت يا القاسيه وعنيده**انت يا النافره وشريده
قايله نفسك ات وحيده**وانت زى شطه فى مديده
انت انسان ام جماد**انت ما نار بل رماد
انت سم فى صوره سماد**ات لبانه ختوها فى وساد
انت قسوه وانت جفوه**وانت داهيه معاها كفوه
اتارى حبى ليك هفوه**ويا قليب سامحنى عفوا
انت ما عندك احساس**وانت عاطل جوه تكساس
انت فى الحب عندك افلاس**وانت عينا غلبت الفاس
انت ظالمه وانت بارده **وانت جافيه وانت طارده
وديمه للحب انت حارده**وقربك لى اقصاه يارده
قصتك جدلى عجيبه**شئ يحير وصفات مريبه
وديمه اسال وما من مجيبه**زى موظف داير الضريبه
انت قلبك من حجار**وانت بارعه فى الكجار
ات مكانك راهبه فى غار**يا الكويتى قلبى بنار
مادى ايدو فرحان وجاك**الا وهمان الرجاك
بعد ما غرقت فى لجاك**وين من الله تلقى منجاك
انت مالك يا وليه**دايره تبقى لى بليه
كنت راجيك تبقى ليا**حبيب تقومى تذيدى العليا
انت اغرب من رايت**من عرفتك وليك مشيت
لانى عاقل لانى جنيت**يا الغدرت وانا ليك وفيت
انت ما بت لالاحاشا**انت مكوه وانت ماشا
ديمه منى انت كاشه** ويا حليل ناس ستى عاشه
انت لا راجل ولا ست**لاكى فيديو ولاكى كاسيت
لاكى لوكسي ولاكى زاست**انت موس زورك وناسيت
تجرحى القلب الحباك**تاذى من دارك واباك
ليه بتنفرى منى يوم داك**قايلانى امك ام اباك
فاكره نفسك انت ايه**انت باشا ولا بيه
العزاب الصرت فيه**ايه جوابك بعدين عليه
انت ما واحده وخلاص**انت ما حزام فى مولاص
فاكره نفسك تكسي خاص**لالا انت كرسى فى باص
انت خشبه ولا حيطه**انت غلبه وانت زيطه
انت ابره مامعاها خيطه**انت جمره وانا الوطيته
انت صخره بل انت جلمود**انت سكين انت عود
انت عداد مربوط فى عمود**انت قانون سنوه الهنود
فى الختام وخلاصه الكلام**انت يا قلبى عليك الملام
وردى قال خليه الغرام**ليه تهان والذل حرام