رغم السنين والغربة والمشــاوير
رغم اللي شوفته وإللي شوفته كتير
رغم الجراح والـيأس والأشبـاح
وقت الصباح بنقول صباح الخيـر
ورغم إن الكــل داق الــذل
الناس ترد تقول صباح الفـــل
والشمس تشرق عـ الجميع وتطل
والشمس ليها عـ القلوب تأثيـر
تنــده عـلينا وصـوتها مازيكة
تمســح سـواد الليل بأستيكـة
والناس تصــدق أي تلكيكــة
تملى قلوبها بالفـــرح وتطيــر
والفرحة ليها فـ الحيـاة معــنى
والمعنى حُــب وصدق يجمعنــا
ولو إجتمعنا ننسى أطمعنــــا
وساعتها نقدر نمعــن التفــكير
الجرح نازف بس ما بيوجعـــش
والشمس تنده وإحنا ما بنسمعـش
وإللي يفوته العمر ما بيرجعــش
وإللي يفوته الحلم فاته كتيــــر
والصبر حلو وبشر الصابـــرين
ولو إختلفنا بردو متفقيــــن
إن الألم والفرح مــــش دايمين
ومهما داقت لينا رب كبيــــر
ــــــــــــ