مكتوب عليا الحلم احلم بيه اقوم فرحان.. يقوم يمشي
مكتوب عليا اخون واحده ماتعرفنيش فمتغيرش
وما اعرفهاش وما اعرفش بحبها ليه
وان فكرت فـِ عينيها بتكره ايه بتزعل ليه مابفهمش
و إن قررت ابقى حقيقي و انساها ما بقدرش
و اقول مكتوب و اقرر أتوب.. و اقول اتقل بلاش اكتب
اروح اكتب و ما اتقلش
و اسمع جوا منى كلام يتقال يفرحني و يتعبني
يبكيني و يسعدني
و وسط الزحمة بين الضحكة والدمعة
الاقيني بطلع طاقة مكبوته علشان خاطر كلام ف الأصل ما اتقلش
اقولك كلمة من الآخر
يا فكرة عايشة جوايا ماتـتـشفش
اكيد قلبي وقع فيكِ ع حاسس ما بيشوفش
و طلبه بسيط يغير إمتى يغير إزاى ..
و امتى يحس بالنشوه يسهرني و ما ينمش
و امتى لما يوم أزعل يواسيني فـ مزعلش
ومن حلمي ما خدتش غير قرار واحد
أنام تانى و احاول اني ما احلمش
عمرو قطامش